Израелските министри за одбрана и финансии објавија планови за воспоставување три нелегални населби во Газа и за обезбедување повеќе од 400 милиони долари (околу 300 милиони фунти) за проширување на изградбата на населби на окупираниот Западен Брег, пренесува „Гардијан“.
Во меѓувреме, израелскиот воен командант задолжен за регионот ги пофали насилните населби, нарекувајќи ги свои „безбедносни партнери“. Со националните избори закажани за 27 октомври, крајнодесничарската коалиција на Бенјамин Нетанјаху настојува да ја прошири контролата врз земјиштето на окупираните палестински територии и да ги протера Палестинците пред да ѝ истече мандатот.
Министерот за одбрана, Израел Кац, изјави дека има намера да воспостави три „Нахал“ пунктови во северниот дел на Газа – вид воени заедници кои со децении служеле како претходница за создавање израелски цивилни населби.
Министерот за финансии, Безалел Смотрич, најави издвојување од 1,3 милијарди шекели (околу 318 милиони фунти) за десетици нови израелски населби на окупираниот Западен Брег. Кабинетот ги одобрил овие средства уште минатиот месец, но одлуката ја држел во тајност поради очекуваното противење од страна на САД, пренесуваат израелските медиуми.
Генерал-мајор Ави Блут, кој комана со израелските сили на Западниот Брег, им изјавил на жителите на екстремистичките населби дека „ја цени нивната работа“ и дека ги смета за безбедносни партнери на војската.
Блут, кој и самиот пораснал во населба на Западниот Брег, говорел во средата на состанок на здружението со еуфемистички назив „Здружение на фарми“, кое ги претставува населбите што се нелегални дури и според израелското законодавство.
