Висококатница во изградба во Бангкок се урна по земјотрес со јачина од 7,7 степени што го потресе Тајланд и соседниот Мјанмар напладне во петокот, соопшти полицијата, додавајќи дека засега не е познато дали има жртви, пренесува Асошиејтед Прес.
Драматично видео што кружи на социјалните мрежи го прикажува повеќекатниот објект со кран на врвот како се урива во облак од прашина, додека очевидци викаат и бегаат. Полицијата изјави дека реагираат на местото на настанот во близина на популарниот пазар Чатучак во Бангкок, но нема информации за тоа колку работници биле на градилиштето во моментот на уривањето.
Напладневниот потрес беше проследен со силен афтершок од 6,4 степени, а луѓето евакуирани од зградите во Бангкок беа предупредени да останат надвор во случај на нови потреси.
„Одеднаш целата зграда почна да се тресе, веднаш се слушнаа вресоци и настана голема паника. На почетокот почнав мирно да се движам, но потоа зградата навистина почна да се ниша. Да, имаше многу вресоци, голема паника, луѓе што трчаа во погрешна насока по ескалаторите, звуци од удирања и кршење внатре во молот.“ изјави Фрејзер Мортон, турист од Шкотска, кој во тој момент пазарувал фото-опрема во еден од трговските центри во Бангкок.
Според првичните извештаи, Американскиот геолошки институт и Германскиот GFZ центар за геонауки соопштија дека земјотресот бил на мала длабочина од 10 километри, со епицентар во Мјанмар.
Во Мандалеј, вториот по големина град во Мјанмар и близу до епицентарот, земјотресот оштети дел од поранешната кралска палата и повеќе згради, според видеа и фотографии објавени на Фејсбук. Иако регионот е подложен на земјотреси, тој генерално е слабо населен, а повеќето куќи се ниски градби.
Во регионот Сагаинг, југозападно од Мандалеј, се урна 90-годишен мост, а оштетени беа и делови од автопатот што ги поврзува Мандалеј и најголемиот град во Мјанмар, Јангон. Жителите на Јангон излегоа од своите домови кога земјотресот удри. Засега нема информации за повредени или загинати. Во главниот град Најпјидо, потресот оштети верски светилишта, предизвикувајќи уривање на делови од нив, како и некои куќи.
Во Бангкок, сирените се активираа кога земјотресот удри околу 13:30 часот, а вознемирените жители беа евакуирани по скалите од висококатниците и хотелите. Широкото подрачје на Бангкок е дом на повеќе од 17 милиони луѓе, од кои многумина живеат во високи згради. Водата од базените на врвовите на висококатниците се излеваше додека зградите се нишаа, а урнатини паѓаа од многу објекти додека долготрајниот земјотрес го тресеше градот.
