Едно лице е повредено со истрели од огнено оружје во Центарот за социјални работи во Прилеп, информираше Јавното обвинителство, од каде велат дека дежурен јавен обвинител извршил увид на лице место во просториите каде се случило пукањето.
Осомничениот пукал од пиштол кон вработена која се здобила со повреди, но е вон животна опасност, како и кон директорот на Центарот за социјални работи – Прилеп. Обвинителството информираше дека директорот не е повреден.
Според првичните сознанија, осомничениот претходно подолг период ја демнел и загрозувал сигурноста на жртвата за што биле водени соодветни кривични постапки против него. Меѓутоа, тој избегал од институција во која издржувал мерка задолжително психијатриско лекување.
Осомничениот е лишен од слобода, а оружјето и други траги се обезбедени и ќе бидат предмет на вештачење.
