Високи претставници за национална безбедност на претседателот Доналд Трамп, вклучително и неговиот секретар за одбрана, испратиле воени планови за претстојни воени напади во Јемен во групен чет на безбедна апликација за пораки, кој вклучувал и главниот уредник на медиумот „The Atlantic“, објави магазинот во сторија која излезе днес. Советот за национална безбедност изјави дека текстуалната преписка „изгледа автентично“, пренесува Асошиејтед Прес.
Трамп првично им кажал на новинарите дека не бил свесен дека овие високо доверливи информации биле споделени, два и пол часа откако веста беше објавена. Подоцна изгледаше како да се шегува за нарушувањето на безбедноста.
Материјалот во текстуалната преписка „содржел оперативни детали за претстојни напади врз Хути-бунтовниците во Јемен, поддржани од Иран, вклучувајќи информации за целите, оружјето што САД ќе го користат и редоследот на нападите“, изјави главниот уредник Џефри Голдберг.
Не беше веднаш јасно дали конкретните детали за воената операција беа класифицирани, но тие најчесто се и барем се чуваат во тајност за да се заштитат војниците и оперативната безбедност. САД изведуваат воздушни напади врз Хутите откако милитантната група почна да напаѓа комерцијални и воени пловила во Црвеното Море во ноември 2023 година.
Само два часа откако Голдберг ги добил деталите за нападот на 15 март, САД започнале серија воздушни напади врз цели на Хутите во Јемен.
Советот за национална безбедност го истражува случајот
Советот за национална безбедност во изјава соопшти дека истражува како телефонскиот број на новинар бил додаден во групниот чет на платформата „Сигнал“. Освен секретарот за одбрана Пит Хегсет, во четот биле и потпретседателот Џеј Деј Ванс, државниот секретар Марко Рубио и Тулси Габард, директорката на националната разузнавачка служба на Трамп.
Голдберг изјави дека поканата за Signal ја добил од Мајк Волц, советникот за национална безбедност на Трамп, кој исто така бил дел од групниот чет.
Хегсет во својата прва изјава за случајот го нападна Голдберг, нарекувајќи го „измамник“ и „дискредитиран таканаречен новинар“, алудирајќи на претходни критички написи за Трамп од магазинот. Тој не објасни зошто Signal се користел за дискусија на толку чувствителни информации или како Голдберг завршил во четот.
„Никој не праќал воени планови по пораки и тоа е сè што имам да кажам за тоа“, изјави Хегсет во разговор со новинарите по пристигнувањето на Хаваи, каде што ја започна својата прва посета на Индо-Пацификот како секретар за одбрана.
Во изјава доцна во понеделник, портпаролката на Белата куќа, Каролина Левит, рече дека претседателот сè уште има „целосна доверба“ во Волц и во тимот за национална безбедност.
Порано истиот ден, Трамп им изјави на новинарите: „Не знам ништо за тоа. Првпат слушам од вас.“ Додаде дека The Atlantic е „не многу значаен магазин“.
До вечерта, претседателот на шеговит начин го отфрли случајот. Тој сподели објава на социјалните мрежи од Илон Маск, во која беше истакната сатирична вест од конзервативен сајт со саркастичен наслов: „4D шах: Генијалниот Трамп ги протекува воените планови во ‘The Atlantic’ каде што никој никогаш нема да ги види.“
Владините службеници имаат користено Signal за организациски комуникации, но апликацијата не е класифицирана и може да биде хакирана. Според експерти за приватност и технологија, оваа популарна апликација за пораки и повици со енкрипција од крај до крај е посигурна од обичните текстуални пораки.