Фондот за здравствено осигурување на Македонија (ФЗОМ) информираше за фишинг измама која се одвива преку лажна веб-страница која се претставува како официјална страница на Фондот и има за цел да украде лични и финансиски податоци за граѓаните.
Измамниците преку лажната веб-страница fzom.net се обидуваат да ги измамат граѓаните да ги внесат своите лични податоци (име, презиме, матичен број, адреса), податоци за здравствено осигурување, податоци за банкарски сметки и кредитни картички, кориснички имиња и лозинки.
Од Фондот за здравствено осигурување ги предупредуваат граѓаните да не ги внесуваат своите лични податоци преку лажната веб-страница. Потсетуваат дека официјална веб-страница на Фондот е fzo.org.mk.
„ФЗОМ веќе презема мерки за да ја блокира оваа лажна веб-страница и да ги заштити граѓаните. Фондот соработува со надлежните органи за да ги идентификува и казни сторителите на оваа измама“, велат од Фондот.
Од таму упатуваат неколку препораки до граѓаните:
- Проверете ја внимателно веб-адресата пред да внесете какви било лични податоци.
- Не кликајте на линкови од сомнителни е-пошти или пораки.
- Не споделувајте ги вашите кориснички имиња и лозинки со никого.
- Пријавете ги сите сомнителни активности на ФЗОМ или во најблиската полициска станица.
- Официјалната веб страна на ФЗОМ никогаш нема да побара од вас внесување на банкарски податоци.
За дополнителни информации и пријавување на сомнителни активности, граѓаните можат да се обратат на официјалната веб-страница на ФЗОМ, на телефонскиот број 02 3289 000 или на мејлот [email protected].
