„Доста бевме ние, системот е следен!“ – одекнуваше денеска во центарот на Скопје каде и покрај дождот илјадници граѓани излегоа да го покажат својот револт и да побараат правда за 59 жртви во пожарот во импровизираната дискотека „Пулс“ во Кочани.
„Колку жртви ви тежат џебовите“, „Нема тишина само правдина“, „Колку мито треба за да ги вратиме жртвите“, „Системот нема да нè спаси“, „Ваш профит, наши животи“ – беа само дел од транспарентите кои демонстрантите ги носеа на денешниот протест.
Поворката започна од плоштадот „Македонија“ околу 19 часот кога се одржа три минутен молк пред насобраниот народ да тргне кон зградата на Собранието. Кога стигнаа таму, беше јасно дека бројката на граѓани се зголемува и сè повеќе луѓе пристигнуваат. Тие извикуваа пароли како „Доста, доста, доста беше смрт“ и „Траспарентност, транспарентност“.
Од Собранието се упатија лево покрај паркот Жена борец и кај Универзитетската клиника за хируршки болести „Св. Наум Охридски“ Скопје ги поздравија со громогласен аплауз кон здравствените работници и жртвите од пожарот во Кочани кои таму се лекуваат извикувајќи „Вие сте херои“. Дел од пациентите во болницата ги отпоздравија од прозорците.
Преку подвозникот кај плоштадот „Скендербег“ и мостот „Гоце Делчев“ демонстрантите пристигнаа пред владата каде се чинеше дека нивниот број сè повеќе се зголемува. Пред зградата на владата се одржа 16 минутен молк, при што можеше да се слушне само звукот на дождот што паѓаше и во тој момент се засили.
Протестниот марш беше организиран од страна на иницијативата „Кој е следен?“, а како што објавија на нивниот Инстаграм профил, нивните барања до властите се повеќекратни.
Меѓу другото, нивните барања за безбедност и превенција вклучуваат воспоставување дигитален сервис „Е-Инспекторат” каде на неделно и месечно ниво ќе се објавуваат спроведените инспекциски надзори од Државниот пазарен инспекторат, Дирекцијата за заштита и спасување, Државниот инспекторат за урбанизам, Државниот градежен инспекторат, Локален градежен инспекторат.
Потоа, воспоставување на нов сервис налик „Европски број за итни случаи (112)”, каде граѓаните ќе можат да се обратат, ако сметаат дека има потреба од било каков инспекциски надзор.
Трето, зголемување на бројот на стручни инспектори во институциите, и четврто, образование и подигнување на јавна свест – означување на сите објекти со некаков вид на информативен материјал кој би содржел информации од типот на: проверка од надлежните инспекторати, инструкции за препознавање на опасности (пр. број на излези, чувство на загушливост, влажност на воздух, патеки за евакуација итн.).
View this post on Instagram
Во однос на пожарот во Кочани каде животот го загубија 59 а повредени се околу 200 лица, од „Кој е следен?“ побараа транспарентно да се објави целата документација поврзана со работењето на клубот „Пулс” од неговото отварање до несреќата од следните институции:
- Државен пазарен инспекторат;
- Министерство за Економија;
- Државен градежен инспекторат;
- Министерство за внатрешни работи;
- Државен инспекторат за урбанизам;
- Локална самоуправа во Кочани;
- Локален градежен инспекторат;
- Дирекција за заштита и спасување;
- Управа за јавни приходи.
Дополнително, бараат дисциплинска, кривична и/или политичка одговорност од сите институции кај кои ќе се утврди пропуст во работењето поврзано со случајот „Пулс”.
Но, исто така и соодветна одговорност за сите поврзани со изгорената модуларна болница во Тетово, за случајот Онкологија, за автобуската несреќата на „Дурмо Турс“ и „Беса Транс“, подобрување на услугите и условите на работење на угостителските објекти.
„Без исполнување на овие барања, Македонија нема како да почне да се лекува. Луѓето заслужуваат одговори. Сите ние заслужуваме правда. Мораме да излеземе на улици сѐ додека целата вистина не е изнесена на виделина. Бидејќи системот по безброј кој пат ја изигра довербата на народот, разрешницата од овој случај мора да биде под окото на јавноста. Народот не смее да биде повторно изманипулиран“, објавија од иницијативата.